A Kileek Kim Tawikhaina

Image via Wikipedia(Lungdamna Aw Lom 3, Hawm 3 March 15, 1978 laimai 1 leh 4 pan a kiteikhia)

“Topa in tawi khaina man lo a zangte mudah a, tawi khaina man a zangte tungah lungkim hi” ci-in Paunak 11 sungah Pasian thu i mu hi. Sum zuak sum leite in a man lo tawi khaina a zat uh Topa in mudah ahih leh, Ama thu tawh kisaia a man lo, a kileek kimlo thuhilhna pen nasia takin mudah zawtham lai ding hi. Tua a hih manin sawltakte, siate leh pawlpi makaite in kidawma i gamtat theih na’ngin a lunghihmawh huai diak thu pawl khat kikum ni.

Lai Siangtho hilhna a buppi-a ngaihsun masa lo-a kammal khat hiam, mun khat hiam bek bulphuha nei ahi zong, tua thu bek siksan a neih khak ding kidophuai hi. Sawltak Paul thuhilhna ahi upna hangah hehpihna tawh gupna ngah thu (Ef 2:8) i hilh ciangin Jesuh thuhilhna ahi gamtatna hoih om lo upna neih khak ding a lauhuaina thu zong kiphawkmawh bawl khak ding hi lo hi. Tham lo in Ef. 2:8 i sim khit ciangin din’ khawl pah lo-in 2:10 zong sim suk lai leeng gamtat hoih a gamta thei lo leitung mite in gamtat hoih i gamtat theih na’ngin Jesuh Khrih sungah hong kigumkhia, hong kipiangthaksak a hihna i tel pah ding hi.

Gupkhiat sa ahi, a piangthak, Jesuh nungzui a kici ei Khristiante in Mat. 22:37 sung thu siksan a, Pasian it ding, Pasian thu bek ngaihsun ding. Pasian tungah ki-ap ding cih thu bek gena nei-a, mihing it ding, mihing thu lunghihmawh ding thu gen mang pen zong a dahhuai thu hi thei hi. Tua bek mei letin 1 Joh. 4:20 thu lawng kha ngei kei leeng thu hilhna kicing lo hong suak thei ding hi. Tham lo-in Mat.22:37 pen thukham masa pen leh a lian pen hi cih i theih zawh ciangin tang 39 sim leeng, “Na pumpi na it bangin na lawmte (mihingte) zong na it in, a cihna thukham nihna in tua a masa thukham tawh kibang hi,” ci lian hi. Jesuh in a kibang hi a cih nungsang e’n zong a kibanga i san ding hi ding hi.

Pasian thu bul bawl nuam kisa in, ‘Mi in khomun bek tawh nungta lo hi. Pasian kam sung pan pusuak thu khempeuh tawh a nungta hi,” (Mat. 4:4) thu i gen ciangin khomun a kici an nek tui dawn pen Jesuh in a thusim lo zaha muut khak ding baih hi. Izipt gam pan Israelte Kanaan zuan a a pai laitak uh a, vantung pana nek ding manna a khiat Topa in a mite adingin an nek tuidawn a lunghihmawh Pasian ahi hi. Leitung an nek tuidawn bek lunghihmawh pen a nei a, vantung nuntakna thu thusim lote hilhna tawh kisai in Jesuh in a gen dawimangpa khemna a thuhna hi zaw hi. “Tunia ka kham khop ding uh an hong pia in,” ci-in thu na ngen un ci-a a nungzuite thu a hilh, an nek ding hong deihsak pha mahmah, gilkial a om mi 5000-te nek ding ngasa leh khomun a vaihawmsak tantan migi Jesuh in an ngawla puksi dingin hong deihsak bang zia-a teci pan khak ding hi lo hi.

A tawntung a ding kha nuntakna pen khang khat bek ding ahi leitung pumpi nuntakna sangin thupi zaw hi cih thu i gen ciangin Jesuh pen kha bek it-a pumpi it lo zaha lah khak theih hi. Tua mah bangin kha leh pumpi in nuntakna bup sungah nuntakna nam tuamtuam nih ahihna thu i gen ciangin kha leh pumpi pen a kisai kha lo hiam a kikhen tuam vilvel zaha kipehna nei lo zaha hilh khak zong a ol mahmah khat ahi hi. Pumpi leh kha pen kisai kha tuah mahmah zaw tham ahih manin na pumpi hiang khat ahi na khut tawh mi na na guksak a, na kam tawh mi na hosiata, na khe tawh mite simmawhna tawh na pek zanzan leh tua na pumpi gamtatnate in na kha nuntakna tawh hong kisai mahmah zaw tham ding hi. Hih leitung ah na pumpi gamtatna in hong tung lai ding vantung a na kha nuntak na’ng tawh tua zaha kisai ahih chiangin kha leh pumpi tuam khen a thu hilh khak ding zong kingaihsut ding hi. Pasian Lungdamna thu a kicinna inah hih leitung nuntakna a kipan sih zawh cianga vantung nuntakna donga zat theih ding thu hi a, na kha bek hi lo-in na nuntakna buppi, na hinna buppi tawh hong it hi cih thu na phawk ciangin Pasian itna in bangzahta’n lian a, za a, thuk ahi hiam cih hong ngaihsun sak ding hi.

Pasian gupkhiatna in mipum khat khat bek tawh kisaia gen a, gambup a ding leh mi nam adingin gupna thu, hotkhiatna thu in khiatna nei lo banga kihilhna in zong a man lo thuhilhna khat hi thei hi. Gam sung leh gam bupa mawhna leh khialhnate khempeuh pen mi pum khat leh khat bek mawhna leh khialhna pana hong kipan khin kikeuh banga ngaihsut khak theih hi. Ahi zongin Lai Siangtho in mawhna pana kisik dinga a sap mite pen mi khat khat lak ten’ ziau ziau a kisik ding a ci bek hi loin mi nam bup khat, leitung bup in zong mawhna leh a khialhna nei hi ci-in tuate khempeuh zong a kisik dingin leh kikheel dingin deih hi. Mi khat khat pen mawh hi cih zong a man mah hi. (Rom 3:23)

Ahih hangin mawhna inah mi pum khat khialhna leh mawhna bek bang zia a ngaihsun a, a siangtho lo an nek tui dawn, a siangtho lo kimawlna a kipan numei pasal mawhna leh khialhna te bek khialhna leh mawhna sa kha-a mi nam kideidanna, leitunga zawnna ngaunate leh gam sung ki ukna sunga thuman lohnate thudon loh khak pen Khristiante ading a kicing hi lo ding hi. Thuciam Lui sung i et ciangin Pasian in mi pum khat bek gum lo-in a nam buppi a a gupna a huhna leh mi pum khat bek gimna pia lo-a a gam bup nam bup-a gimna a piakna mun tampi om hi. Sodom leh Gomorrah pen a vekun gimna kipia hi. Nineveh khua ah Jonah in thu a hilh lai in mi pum khat bek kisik dingin ci lo-in a khua buppi a kisik dingin ci hi.

Mat. 28:19 sungah Jesuh in mi pum khempeuhte nungzui suak dingin a cihna i muh mah bangin mi pum khat bek hi lo, mi nam in zong thukhenna thuak ding hi ci-in a genna Mat 25:31-46 kimu hi. Tua hi-a mi pum leh gam kikhen thei lo-in mi pum khat kigawmkhawm, kipawlkhawm a om i hi (Rom 13, 1 Pi 2, Ef 5 & 6). Mi pum khat bek nuntakna pen Pasian thu in a gen sak khakna bangin gam sung thu leh nuntakna ziate Khristiante in thudon kul lo ding ngaihsutna leh tuate suk khak leh lawn khak pen a siang lo zaha kihilhna om thei a hih manin dahhuai hi. Hih thu tawh kisai-in Billy Graham in “Jesuh in suahkikna thu khut lang khatah tawi-in a lang khatah tui hai khat tawi dingin hong hilh hi. Na dang khempeuh tawh gam sung haksatna leh thuman lohnate zong i lunghihmawh ding ahi hi. Lungdamna thu pen tangpi tangta nuntakna tawh kisai hi cih thu ka hanciam tawntung hi. Gam sung haksatna thute thudon lo-a om kha Khristian pen dahhuai hi” ci ngei hi.

1967 kuma America Kumpi in “Zawn’na Gal Do Ding” (War on Poverty) cih thu kikupna Washington khuapi-ah a pai lai-in mi tampite in a mawhsakna thu pen Billy Graham in a thuh kikna-ah mi zawngte leh ci mawhte kep ding don ding thu Lai Siangtho sung mun 175-ah om ahih ciangin zawn’na langpan’ dingin Lai Siangtho in hong hilhna lian khat hi ci hi. “Na khut taklamah Lai Siangtho tawi-in na vei lamah leitung thukizakna (newspaper) tawi leteh Pasian nasep zia ding na tel pan ding hi” ci-in gen ngei hi. Pasian thu aipeng noptuamna ding sa i hih manin angsung thei Khristian tampi ki-om kha-in “Kei siangtho peuh leng hih leitung bup gam bup pen a nit hang phamawh sa ke’ng” ci bang pianin mi tampite i nuntak manin i kingaihsut phat ding kul hi.

“Leitung” kici kammal telkhialhna in zong a dahhuai khat hi. Vantung thu leitung thu, Pasian thu deih kisa-a leitung thu leh leitung nuntakna thu khat peuhpeuh nasim lo hiam, a kihhuaia seh khit hiam zong man lo kha ding hi. Leitung nuntakna sunga gamtatna man lote genna in “leitung” cih mah a om manin kitel khial thei hi. Pasian in leitung ita a Tapa hong pai sak zaw tham a hih ngaihsunin, dawimangpa bek i piak bawl tawntung ding hi lo hi. Pasian deihlohna tawh kituak genna leitung leh a deihna tawh kituak genna leitung kammal omnate lim takin Lai Siangtho ah kan ding kisam hi. “Wheaton Declaration of 1966” kici sungah “Lai Siangtho cihna tawh kituak zia lo bang pi-in leitung pan pumpi kituam bawla i om sawmna bangin leitung haksatna leh kisapnate pha takin i sem thei kei hi” ci hi. Leitung a ding ci i hihna tuat pha ni (Mat. 5:13).

Tu huna Pasian thu gupna thu i san cianga i khialhna lian khat in Jesuh Khrih pen mawhna khialhna sung pana hong honkhia thei ciang bekin sangin Kumpi Topa ahihna i sang kei hi. A sia lamin gen leng, Jesuh pen i cihmawhna pan hong hon ding bek-a deiha, a thu zuih ding, a ukna man ding leh thudot ding a sang nuam lo i suak hi. Hong hotkhiatna pen hong uk nop man leh a deihna i zuih theih na’nga a hong honkhia hi zaw hi. Ama’n hong hotkhiat ciangin ama huhna tawh ama deihna zuih theihna thu hong guan hi. Tua pen Kha Siangtho nasepna hi. A tak takin Jesuh pen mi pum khat tung bek ah vaihawmna ana nei hi lo-in leitung leh vantung a ana khempeuh a neipa hi (Mat. 28:18). Na khempeuh ama piansak ahi hi (Joh. 1.3). Kumpi tokhomte, uknate, a sang bel nate leh vangliatna khempeuh zong ama piansak hi a, amahmah in uk hi (Kol. 1:15-20). Tua hi-a gupna deihna pen a kipiangsak nate khempeuh in suahtakna a ngah na’ng ahi hi (Rom 8.19-22). Mihingte pian’thakna ding bek hi lo-in na khempeuh in a thak a suah na’ng thu pen Lungdamna Thu ahi hi (Mang 21:5).

Lungdamna Thu Gingsak Un

(Lungdamna Aw Vol.1 No.1 March-April, 1976, laimai 1 leh Vol 1 No.2 May-June, 1976 laimai 1 leh 4 pan kiteikhia)

Ei mualtung gamte ah Khristian biakna thu hong tun nungsang kammal thak i zat bel khat in Mission ahi hi. ‘American Baptist Mission’ hi’ng, ‘Welsh Mission hi’ng, ‘N.E.I.G. Mission hi’ng’ i kici thei puut hi.

Tua in bang deihna, bang khiatna, bang cih nopna taktak hiam cih kan tuan nawn se lo-in, Khristiante’ kipawl khopna min bangin i zang thei pen hi. Tua pen a hih tei hangin biakna tawh kipawl a kizatna panin thupuak nasepna thu gen nopna hi zaw hi. Pasian lungdamna thu mi khat pan mi khat, mun khat pan mun khat leh gam khat gam khata kipuak sawnna nasepna in ‘mission’ kici hi.

Pasian thu khat leh khat kihilhna thu hi a, a mun a gam bangtan gamla hi ding cih thu pen a deihna lian hi masa lo hi. Tua banga nasepna a hong sem, thu a hong puak mite pen ‘Missionary’ kici hi. Abei sa kum bangzah hiam a kipanin tua banga Pasian thu a hong hilh Missionary-te in hong ciahsan zawh ciangun eite pen ‘T.B.A., ‘C.B.A.’, ahi zongin, ‘Presbyterian Synod’, ‘N.E.I.G. Mission Church’ ahi zongin pawlpi ci-in pawlpi (Church) min i kivawh leuleu hi. Gamdang mite’ kepna khoina Mission hun panin ei leh ei a ki-uk a kikeem thei Pawlpi-Church hun tung ta hang i kicih nopna khat ahi hi. Tua ahih leh mission kici kammal eite in i zatna ding a kisapna om nawn lo hi i ci thei ding hiam? Hih dotna in tu-a i kikup nop pen thu a hi hi. Mission bangcih nopna hiam? Lai Siangtho hilh siam Rev. Dr. John Stott in hi bangin ci ngei hi: ‘Pasian in Pasian a hihna hanga na a sepnate in mission hi. Lai Siangtho sunga nungta Pasian pen thupuak Pasian hi i cih ciangin Mission khiatna gen hi hang’ ci hi. Pasian in a Tapa Lungdamna Thu puak dingin hong paisak a, tua mah bangin eite zong tua Lungdamna Thu hilh sawn, gen sawn dingin Jesuh in thu hong pia hi. Tua pen Mission hi. ‘Pasian in Mission phuan a, Jesuh pen Missionary hi a, leitung pen Mission Field hi’ a cih pak pen thuman khat hi. Tu huna Mission Committee, Missionary Board, Missionary Society cihte hong kiphuh ngeingaina in hih thu hang ahi hi.

Mission kici kammal pen i zakna sawt zo ci phot ni. Tu huna i zak mun mahmah khat pen ahih leh Evangelism kici kammal hi. Hi pen Evangel kici pan hong kizang hi a, tua pen Gospel kici tawh a khiatna kibang hi. Gospel pen Lungdamna Thu ci-in i Lai Siangtho sungah kizang hi. Jesuh in Ama nuntakna tawh leitung mi mawhte hong gup khiatna thu, nuntakna thu gen nopna hi a, tua pen lungdam huai ahih ciangin Lungdamna Thu kici pah hi. Tua ahih ciangin Evangelism kici pen a tomin gen pak sawm leeng, Lungdamna Thu, Gupkhiatna Thu pulakna leh kizelhsakna nasepna thu kici thei ding hi. Bang ci-in Lungdamna Thu genin, semin, hilh le’ng kicing thei peen ding hiam cih thu in Evangelism hong suak hi. Hih tawh kipawl in Lai Siangtho thu a hihna, a hilhna bang a lente, a saangte in Evangelical Pawlpi ci-in zong kigen thei hi. Tua bang thu a lente leh a sang mite in zong Evangelical kici thei-a, amaute gamtatna leh sepna thu pen Evangelistic nasepna kici thei hi. Tua ahih ciangin tu huna Pawlpi nasepna sungah ei kammal a hi lo, Mission, Gospel, Evangelistic, Evangelical, Evangelism cihte hong kizatna pen thu lamdang hi lo zaw a, a khiatna leh a zatna i kikup taang ciat ding thu khat hi zaw hi. Kha khanlawhna hong tung a, Pasian nasepna tawh kipawl lawpna, thanuamna leh hahkatna hong piang a hih manin kuama peuh nuam hang.

Thu khat panin, ‘Pasian na sem ni’, ‘Gupna thu, Lungdamna Thu gen ni,’ i cih ciangin thu haksa lo tawh a kibat hangin, ‘Bang ci sep ding, bang ci gen ding?’ cih thu i gen ciangin ngaihsutna kibang kim pah loin, kikup ding thu tampi tak hong piang thei hi. Tua pen tang lai-in zong hi a, tu hunin zong hi ve ve hi.

Lai Siangtho siam khat ahi Leighton Ford in a genna panin Thuciam Thak Bu sunga Pasian nasepzia (Evangelism) pawl thumin hong lak hi.

1. Khat leh khat ki-itna tawh kipawl khawm a, teci panna (Koinonia). Marka 2:16 sungah Jesuh in a sepzia kimu hi.

2. Khat leh khat kikep kikhoina tawh teci panna (Diakonia). Cinatna nam tuamtuam a veite damsakin, dawite hawlkhia-in Jesuh in Pasian na seem hi (Marka 1:34).

3. Lungdamna Thu genna, pulakna tawh teci panna (Kerygma). Mawhnate kisik a, Lungdamna Thu saang dingin Jesuh in thu hilh hi. (Marka 1.14) Tanglai sawltakte hun lai-in zong hi bangin na seem uh hi. Khat le khat ki-itna tawh kipawl khawmin teci pang uh hi. (Sawltak 3:6). Tua ciangin hahkatin Pasian thu hilh uh hi (Sawltak 5:42). Gambup Pawlpi in a hi zong, khua pawlpi in a hi zong, mi pum khat in a hi zongin Pasian na i sepna uh, Jesuh a ding teci i pan’na-ah hih thu thumte ki-itna tawh kipawlna (fellowship or koinonia), hehpihna tawh nasepna, gamtatna (service or diakonia), leh kam tawh hilhna, pulakna (proclamation or kerygma) a kicingin i zat kim ding, i zuih kim ding a hi hi.

I phawk kik ding thu pawl khat om hi. Pasian Thu, Lungdamna Thu, Lai Siangtho Thu, Khristian Thu Upna kici leh biakna dang a tuamtuamte kilamdanna lianpen in Kha nuntakna thu a hi hi. Lungdamna Thu kici-in mihingte in mawhna sungah a sihna pan nuntak kikna a ngahna thu cih nopna hi. Johan 3:16 in a gen zong tua thu hi. Tua hi-a tanglai mah bangin tu hunin zong Jesuh Khrih a saang, Amah hanga nuntakna thak a ngah, Amah hanga mi thak a suak leitungah a ni ni, a kha kha-in kibehlap tawntung a hih manin Topa min i phat hi. Tua laitak mahin gupna thu, suahkikna thu, lungdamna thu a saang nuam lo, a saang thei lo mi tampi tak Pawlpi sung mahah a hi zong, Khristian kici min pua mite lakah a hi zong om lai a hih manin dahhuai hi. Tua bangin thu-um nai lo, Pawlpi pua lamah a om lai mite i teci pan’na kitelh zo lo hi. Amau ading thu i ngetsak ding i tavuan lian hi. Tua ciangin Lai Siangtho thu a thei, suahkikna thu a kamngah, Lungdamna Thu a thei, a hih hangin amah pen Jesuh tungah a ki-ap lo Jesuh thu a zui lo hi napi’n ama theih bang a thei lote a simmawh pawl khat a om manin dahhuai sem hi. Tua ciangin amah in gupna thu sang a, kha nuntakna zong ngah takpi hi napi, ama muhna leh theihna bang leh zuihna bang a ngah nai lote a hi zong, ngah nai a sak lohte a hi zongin te pen neu et kha pah a, amah leh amah tawh kibang zaw diakteng pen ‘misiangtho’ pawl lima kibawla pawl tuam phuan a hi zong, a phuat sawm a hi zong om thei hi.

Tua banah amahin suahtakna, nuntakna thak, kikheelna thak a ngah kha beek zong hi lo napi tua ‘misiangtho’ pawl penah va kihel sam a, amau pawla kihel lote a thusim hiau lo mi pawl khat mah om hi. A taktakin ci leeng hi banga thu zuau gen a, a kineih, tuu vun a silh ngiate hangin mi tampite in Jesuh hotkhiatna thu sang thei lo uh hi kha ding hi. Lam khat panin tua banga a kineih a kibawlte hanga ei a lunghihmawh, a deih taktak kimlai-in Jesuh thu thudon lo-a mot om pen lah dahhuai sawnsawn hi.

Tua ahih ciangin Pawlpi makaite, thuhilh siate leh thu-um mite khempeuh in i Pasian nasepna, i teci pan’na kingaihsun pha ciat ni. Lungdamna Thu a kicingin mi buppi adingin hilh ding hi. Gupna in tawntung nuntakna thu hi a, tua kha a nei mipa/minu in pumpi leh lungsim nei mihing a hih mah bangin, it khin hehpih khin, gum khin nuam hi. Gum thei hi. I thu hilhna in vantung lam bek sukha lo-in leitung zong a suk khak ding hi. Jesuh vantungah om den lo-in leitung ah hong kumsuk ciangin Lungdamna Thu kici hong piang thei pan bek hi. Pasian Thu a za nai lo, gupna thu a sang nai lo, khuavak a ngah nai lo mite lakah “Leitung ci” leh “Leitung khuavak” i suah ding pen i mission nasep hi. Ci leh khuavak in leitung panin al kei luateh, mial luateh ci-in kidaithah mawk-le-uh amaute a alsak, a vaksak Jesuh adingin amau geelin kimanna nei lo suak ding hi. Khatvei College ah ka kah lai-in ka siapa un Khristian nuntak zia ding, pawlpi nuntak zia ding hong lahna tu dongin ka mit kha-ah luai lai hi. Suang laivom sungah mihing lungtang a hi zong, pawlpi lungtang lim a hi zongin dingin beem (o) golpi gelh hi. Tua beem laizang takah beem khat gelh kikin, tua sungah Khrih omsak phot hi. Tua Khrih beem panin Pasian tawh kipawlna (worship), lawmte tawh kipawlna (fellowship), Lai Siangtho simna (Bible study), thungetna (prayer), thuhilhna (proclamation/preaching), leh gamtatna nasepna (service) te hong mengkhia sakin a gol beempi pen a kikim ciatin hong kihawmsak liailiai hi. “Jesuh Khrih sungah i khantohna a kidom kim ding hi, khen tuam dei tuam om lo ding hi” hong ci hi.

Tua ahih ciangin thugenin, Lai Siangtho enin Mission leh Evangelism thu pawlpi in lim takin a ngaihsut ding thupi hi. Kha mangthang a zong lo pawlpi in a mangthang pawlpi hi a kicih mah bangin mi ngah na’ng i hanciam ding hi. Tua kha mangthang i zawn penin nang leh keimah bangin a gilkial thei, natna satna a thei pumpi nei, a heh thei, a nuam thei, a dah thei lungsim nei hi cih zong phawk khial lo-in, Jesuh mah bangin a buppi-in i it ding hi. Jesuh in a phel lang khat bek it lo hi. “Kha Siangtho tua bangin kikaisak lecin (lehang), vantung na seem dingin siam ding sawt lo-in.”

Related articles by Zemanta

• Lia Zamnu Interview-na (Lelte Weekly)
• Can a rock band perform gospel songs?
• Buonglienkung is no more!
• Scavenger Project - Showcasing Mizo Musical Talents
• Religious Conversions Reconsidered
• Lelte Weekly Interviews Zamnu - The Burmese Sensation
• Free eBook From Zo Aw: Download Now!
• Zo Lengthe - My Favourite Zomi Rock Song
• Norwegian Baptist Union to Help Mautam victims in Chin State, Burma

Sang Leh Lai Tawh Kipattahna Panin

(Zolai Kum Sawmnga Cinna Pawi 1925-75 Lamka, Laimai 15-18 pan a kiteikhia)

Leitung bup minam ciaptehna pan Mongolian minam a hi, Tibeto-Burman kam a zang Zomite pen Burma, India leh Bangladesh gamte-ah i teeng hi. Burma-ah Chin Hills, Upper Chindwin leh mun tuamtuamah i teeng hi. India ah Manipur, Mizoram, Tripura, Nagaland leh Assam gam mun tuamtuamah i teeng hi. Bangladesh-ah Chittagong gam sungah i teeng hi. Tua bangin mun tuam gam tuamah teengin kikhenthang i hih manin i ngeina, i gamtat leh kampau kibang kim lo hi. Tua hangin mite in zong minam tuamtuam mah hong sa-in Chin, Kuki leh Lushai cih bangin min tuamtuam hong guan uh hi. Tua bangin eite in zong i kam zatna tawh kituakin Laimi, Mizo, leh Zomi cih bangin i kilo hi. A tomin ci leeng, minam khat hi napi hangin gam tuamtuamah min tuamtuam leh kam tuamtuam zangin i om hi. Tua a hih manin mi tuam nam tuam takpi mah a kisa zong i om hi. A hih hangin tu hun ciangin lai pilna tawh khuamuhna, gamtatna leh ngaihsutna hong tangzai zaw ta a, kikawmna, kiphakna zong hong ol zaw ta a hih manin pum khat sa khat i hihna pen kitel pianpian ta a hih manin lungdam huai hi.

1890 pawlin British Kumpi in hong khangin i gam hong uk a, tua tawh kitonin Khristian makaite hong tun ciangun i minam tangthute lai-ah kikhumin, i kam i lai zong tua hun ciangin hong piang hi cih ding a hih manin a khangmoi mahmah lai minam khat i suak hi. Tua ahih manin 1900 ma lam tangthu gen ding tam pha lo-in a beisa kum 75 sung thu panin i minam leh gam nuntakna zia kikum thei leeng zong a kicing mahmah lai ding khat ahi hi. Tu-in kum za-sim 20-na a cin’na ding kum 25 bek in sam lai a, seh li suah seh thum pen i zang khin hi. Tua a hih ciangin kum 2000 a cin’ nading a sapna kum 25 sung teng pen bangci bangin zangin zeek leeng i gam i lei, i minam a dingin manpha thei pen ding hiam cih thu ei tu khang mite in i lunghihmawh ciat ding kilawm hi. Hong tung ding kum 25 sungin a beisa 75 sunga thu piang, na piang leh mi piang khempeuh sanga tam zaw leitungah piang ding hi ci-in mipilte in ummawh uh tham lo-in, tua phawk kawm gige-in kalsuan ding, ngimna geelna neih ding hanciam uh hi. Tua a hih leh, Zomite in zong lungpilna ngaihsut siamna tawh i kalsuan kul ding hi.

Mi dang gam dangte zahin i pilna, i siamna leh hauhna a kicin’ nai lohna hang tawh kihawmthawhna tampi i neih hangin i gam in lei leh a ni a kha tawh kituakin thupha tampi Pasian in Zomite hong pia hi cih thu i phawkkhialh loh ding thu khat hi. British kumpi in kum 60 tang hong uk zawh uh 1947-48 ciangin Burma leh India in suahtakna ngahin, tua pan Pakistan hong piangin, Pakistan panin 1971 kumin Bangladesh hong piang hi. Tai patle 13,902 a zai, mihing 32,300 (1973) a pha Chin Hills pen 1948 ciangin Chin Special Division kici-in Chin Affairs Council leh Chin Affairs Ministry nei-in ki-uk hi. Gam vaihawmna-ah Vum Ko Hau, Mang Tung Nung, Shein Htang, Vuan Tu Maung, Za Hre Lian, Ral Hmung, Thang Lian, Lun Pum leh ulian dang tampi min hong kidawk hi. Kumpi nasepna sungah Thawng Cin Thang, Tuang Hmung leh mi dang tampi mahin min hong nei uh hi. Galkap lam zong kidawm tuan lo-in Dal Za Kam, Lian Cin Zam, Khen Za Mung, Hrang Thio, Putpa, Pau Khan Thang leh adang tampi mah i lungnoppih uh hi. 1962 kuma General Ne Win’ makaihna tawh galkap in gam vaihawmna hong let ciangun Chin Supreme Council kinei a, Son Kho Lian in hong makaih hi. 1974 ciangin Burma in Upadipi thak nei a, Chin Special Division pen Chin State hong suak hi. Gambup vaihawmna lian pen Council of State-ah Chin State panin Khen Za Mung leh Thakin Aung Min, Council of Ministers-ah Vankulh, leh vaihawmna hiang tuamtuamah ulian tampi kihel hi. Khristian pawlpi lamah S.T. Hau Go, Van Bik, Kyon Bil, Hre Kio, Kam Khaw Thang te-a kipan mi dang tampi in hong makaih uh hi. Tua bangin khantohna hong piang a, tu ciangin kumpi nasem ulian, galkap mang, zato siavuan, sitni omin, M.A., M.Sc., Ph.D. cih mah a ciangciang panin hong pusuak nainai hi i ci ding hi.

Tai patle 8143 a zai, mihing 332, 390 (1974) a omna Lushai Hills pen 1952 kumin District Council-in ki-uk hi. Tua huna kipanin R. Vanlawma, Pachhunga, Lalsawia, Ch. Saprawnga, H.K. Bawichhuaka, Chalchhunga, Lalmawia, R. Thanhlira, C. Pahlira, A. Thanglura, Hrangaia, Lalbuaia leh mi dang tampi min hong kigen hi. Kumpi nasepna panin Hmingliana, Lalbiakthanga, Khawtinkhuma, C. Lalrema leh a dang dang in za lian hong ngah hi. Galkap panin Thenphunga, C. Vankunga cihte in min hong nei hi. Khristian pawlpi lamah Zairema, Ngurauva Ralte, Pazawna, C. Lalhminga, leh a dang tampi mahin makai uh hi. 1972 ciangin Mizo Hills District pen Union territory hong suakin Mizoram cih min hong pua hi. Legislative Assembly nei-in Chalchhunga, R. Thangliana, H. Thansanga, Ch. Saprawnga, Vaivenga, Khawtinkhuma, Lalsangzuala leh ulian dang tampi in vaihawmna len hi. Sangliana in M.P. sem hi. Tua bangin khantohna piangin, zum nasem ulian, siavuan, galkap mang tampi omin, M.A., M.Sc., Ph.D. cihte leh I.A.S., I.F.S., I.P.S. cihte a gamgamah hong kicing mahmah hi.

Tai patle 8628 a pha, mihing 10,72,753 (1974) ten’na Manipur pen suahtakna ngah ciangin State minin tawmvei sung ki-om hi; tua zawh ciangin Part C State kihi kik a, tua pan Union Territory in sawtpi mah a ki-uk zawh ciangin 1972 ciangin State i ngah kik uh hi. Tua sungin gam vaihawmna-ah Teba Kilong, S. Vungkhom, Paokhohang Haokip, Paolen Haokip, T. Goukhenpau, Pauneikhai, N. Gouzagin, T. Gougin, Haukholal Thangjom, Ngurdinglien leh a dang ulian tampi hong khang khia uh a, India Parliament-ah Paokai Haokip M.P. in i nei hi. Kumpi nasepna-ah Thangkhopao Kipgen, T.C. Tiankham, H. Vum Khaw Thang cihte leh mi dang tampi in hong makaih uh hi. Khristian pawlpi lam panin Nengzachin, Rochunga Pudaite, T. Jam Khothang, Dongkhothang Singson, Mangkhosat Kipgen leh a dang tampi mahin hong makaih uh hi. Tua ciangin zum nasem ulian, siavuan tampi M.A., M.Sc., a kipan I.A.S., I.F.S., I.P.S. cihte dongin ulian tampi hong piangkhia hi. Manipur gam mi buppi seh li suah seh thum tang pen Meitei hi a, seh nihte pen Naga leh Zomite hi hang cih theih ding hi. Tua hi napi-in a mi tawh kituakin Zomite in nasepna leh vaihawmna kilen kawikawi bilbel hi.

Kampau leh lai tawh kisai-in Mizoramah Lusei kizangtang pen hi. Mualtung Manipur ah a kizat kim theih loh hangin Manipur-ah Meitei kam kizangtang pen hi. Chin State ah a kizangtang kam piang zo nai lo a hih manin haksatna leh supna tampi om hi. Lai leh kam pen pilna siamna kihawmna, kikawmtuahna bulpi a hih ciangin i lunghihmawh ding thu lian khat hi. Hih thu tawh kisai-in Tedim kam pau mite in tavuan lian nei uh hi ci le’ng kikhial lo ding hi. Bang hang hiam cih leh kam nam khat zang panin Chin State sungah a milip tam pen a hih mah bangun zum nasem, sangsia, galkap leh lai pilna a ngah zong tam pen a hi uh hi. Sumsin sumbawl a hahkat mi a hih mah bangun neih leh lam zong a kicing zaw gam hi a, Chin State pua Burma gam sung mun tuamtuamah Tedim kam a zang mi a om bek tham loin India gampi dongin kizang thei kawikawi hi. Sang leh lai tawh kisai-in Burma ah gambup kam leh lai a hi Burmese banah gamkete leh minam tawmte’ kam leh lai zong zum sung sang sungah zat theih, puah theih na’ng thu a thak Upadi Nambat (Article) 102 leh 152 sungah lim takin hong kikhumsak ciatciat hi. Tua bang mahin India gamah zong gam bup kam a hi, Hindi leh English banah gamkete leh mi nam tawm zawte’ kam leh lai puah ding, zat ding thu Upadi Nambat (Article) 29, 30 leh 46 sungah a kicingin kigelh hi. Ei a puah ding, a zang ding mite i ginat ding, i kivak i kizen ding bek thupi hi. Kumpite in hong huh nuamin a mansa-in om uh hi.

Lokhawh singpuak haksatna gam, sing kawm suang kawma teeng, kumpi tuamtuam vaihawmna nuai-ah a kikhen minam i hih hangin a toma i gen samsamna bek panin zong i gamah khantohna nakpi tak piang hi i ci ding hi. Tua thu i ngaihsut ciangin Pasian in Zomite deihna zatnopna khat hong nei hi ding hi cihna lungsim hong guan hi. Gentehna pak panin, 1973 August kha-in Calcutta khuapi-ah Zomite khat Customs & Excise zuma mang lian Collector khat ka mu hi. November kha-in New York City-ah Indian Mission to UNO-ah Secretary a sem khat na om hi. 1974 May kha North East India Christian Council kumcin’ kikhopna Tezpur ah President a kipan ulian dang tampite in Zomi vive a hi uh hi. Gauhati vanleng tualpi-ah 1975 September kha-in Manipur Gam Director of Tourism, Manipur gam Secretary, India kumpi Income Tax Officer, Gauhati University a Ph.D. a kah laitak, Allahabad University pan M.A. a man khinsa, Eastern Theological College pan B.Th. a man khin lian tawh zing tungin ka kisutuah kha uh hi. 1976 January kha-a Hyderabad khuapi-ah Evangelical Fellowship of India (EFI) Silver Jubilee khoppi lian a kineih lai-in hun ukpi a kipan makai dangte leh Pasian phatna lapawl sate in Mizoram leh Manipur pana pai Zomite a hi uh hi. A kha kik February kha-in Imphal vanleng tualpi-ah Manipur gam Cabinet Minister leh Hill Standing Committee-ah Chairman a sem masa penpa te gel tawh ka kimu kha uh hi. March kha-a Manipur Baptist Convention kum nga hal kikhoppi Imphal-ah a om lai-a mihing 10,000 mai-ah, “Hong Honpa Itna Gengen Nuam Ka Sa” ci-a la tawh teci a pang, tua late mah April 2, nitak nai 5, minit 5 hun lai taka All India Radio, Imphal, pana hong sakhia zuaizuai mite in Chin Baptist Choir (Manipur) te a hi uh hi. Hih banga i mit tawh i muh, i bil tawh i zak thu tawm khat i kaihkhop pakte nangawn in Zomite khut sungah talen lian hong kikoih hi cih hong lak hi. Tua hi-a Pasian zahtak kawma sang leh lai tawh kipattahna panin gam leh lei-ah khantohna, mainawtna leh nopsakna piang thei-a, piang thei lai ding hi.

Related articles by Zemanta

• An Interview With Bianca Son
• Money or Your Language
• Norwegian Baptist Union to Help Mautam victims in Chin State, Burma
• Chin, Mizo, Zomi or Kuki- Which is the most politically acceptable identity for a Zo?
• Religious Conversions Reconsidered