Tu nai diakin Asia gambup tawh kisai khoppi nih vei om hi. Nov. 1-10, 1978 sungin Asian Leadership Conference on Evangelism (ALCOE) ci-in Khristian makaite Asia gam tuamtuamte panin Pasian thu hilh zia ding kikumin kikhawm uh hi. Tua mah bangin amasa pen Asia Gambup kikhopna Baptist makaite in India gam Hyderabad khua-ah January 8-14, 1979 sung kikhopna nei-in teci pan zia ding kikum uh hi. Ei gam leh ei lei bek hi lo-a i gam veengte khualna tawh Pasian thu kikupna hi bang i neih theih manin lungdamhuai mahmah a, tham lo-in a tangzai zaw Pasian nasepna i hanciam ding thu hong phawksak hi. Hih Asia gambup Pasian nasepna thu leh kikhopna thute i ngaihsut ciangin gam tuamtuam panin tangmite pai diamdiam hinapi’n i sanggam i u i naute omna Kawlgam panin tangmi hong pai theih loh thu uh i ngaihsut ciangin i dah hi. A beisa hunin biakna vai tawh kisaia gampua zin pen Kawlgam panin haksa hi ci-in i thei uh hi. A lungdamhuai thu khat panin mailam ciangin khualzinna pen hong ol zaw deuh ta ding hi ci-a upmawhna om hi. Makaite in Asia gam buppi nasepna zia ding a lunghihmawhna uh i ngaihsut cianginn ei zong i gam leh i mi nam tawh kisaia Pasian nasepna thu khat leh khat kikum thei leeng pha ding hi.
Kipawlna: Manipur gamah mi nam tuamtuam leh kampau tuamtuam zang mi tampi i om manin Association phuanin, tua Associationte kipawl khawmin Manipur Baptist Convention ci-in i gam sung leh gam pua-ah teci pan’na i neih mah bangin Chin Hills sungah leh a pua-ah a om Tamu, Kabaw Valley, Homalin gamte leh Asho Chinte dong kipawlin Zomi Baptist Convention ci-a Kawlgam sungah kipawlna a om pen a man pha leh a it huai mahmah teci pan’na hi ci-in i thei hi. ZBC zum pen tulai takin Falam hi a, tua laiah nasepna hiang ahi, Lai Siangtho sang Zomi Baptist Theological Seminary leh Zomi Baptist Press zong om hi. Khamtung gam pen lam haksa-a, kikawmna ollo ahih manin khoppite leh committee pai ciangin, ni tampi, thatang tampi, leh sum tampi bei ahih manin Upper Chindwin lam sanggamte bangin kipawlna tuam nei a thakhat-a Burma Baptist Convention tawh kipawl ding ut uh hi ci-in i za ngei zel hi. Tua pen man kha ding hi. Ahih hangin mai lam sawtpi ding khualna tawh ZBC mahah Zomite khempeuh kipawl khop pen khamtung gam hi lo-in Kawlgam sungah Zomite adingin Pasian nasepna tangzai zaw hong hi kha ding hi. Kipawlna pen khatvei kikhen phot leeng kigawm kik cih pen thu baih lo mahmah ahih ciangin kikhen lo-a nasep khop liailiai mah hong hoih zaw tam ci-in ngaihsut theih hi. Thu khat panin a gamla diak Associationte leh tua ciangin ZBC nasepna mahmah zong a tangzai zawk na’ngin ZBC nasepna pen Falam bek ah gawmkhawm (centralized) sangin Khanglam Khamtung gam Mindat leh Kalemyo cihte ah Lai Siangtho sangte, lai khetna sette ahi zong koih kawi kawi-in, thamloin Associate General Secretary zum cih bang zong Tedim cih bangah koihin kihawm (decentralized) kawikawi leh ci-in zong ngaihsut theih hi. Bangbang hileh ngimna leh deihna bulpi pen Zomi Khristiante in pumkhat suak a, kipawl khawmna teci pan’ theih na’ng hanciam tawntung ding hi.
Lai leh Radio: Tu hun ciangin a hau zaw leh a pil zaw gamte in kikawmna (communications) tawh nasep hahkatin, Television, Radio, drama akipan laibu leh laidal tawh Pasian thu nakpi takin gen uh hi. Hi bang nasepna tawh kisai-in ei zong lai leh radio zanga nasep pen hanciam phat lai dingin kilawm hi. Sawltak Paul in Pawlpite laikhak in, lai tawh hansuah tawntung ahih manin tua a laikhakte pen tu dongin Lai Siangtho sunga a manpha thute ahi hi. Pumpi tawh i pai theih lohna leh i pai zawh lohna mun leh gamte leh pumpi tawh i muh zawh loh i sanggamte tawh lungdamna thu i kikup theihna, a kihilh theihna pen laibu leh laidalte hi. Tua ahih ciangin Association in i sep banah ZBC panin zong lai lam nasepna pen thupi sim zo leeng hoih ding hi. Khua Pawlpi akipan Association leh Convention dongin laibu sai phuat kawikawi tuak hi. CBA in laibu pawl khat khenin, laibu sai neu khat hongin, Lungdamna Aw i khen hi. Hite pen kicing zo nai dek lo ahih ciangin puah toh lai na’ng akisam tampi om hi. CBCNEI in Gauhati, Dimapur, Imphalte-ah laibu sai a phuan hi. Tua bang mahin ZBC in zong gentehna’n Kalemyo leh Mindat khuate-ah laibu sai-in biakna laibu manpha tuamtuamte zuakin i mite lakah pilna leh Pasian khuavak puak zo leeng hoih peuhmah ding hi. Tua banga Pawlpi in a phuat zawh lohna mun leh khuate ah Pawlpi khat, sumbuk khat-in zong Topa itna lungsim tawh kiphuan thei ding hi. Rangoon hi taleh, Gauhati leh Imphal pan hi taleh Zopau tawh Kumpite in radio zangin thu leh la hong hilh uh i za tawntung hi. Tua pen Pasian thu hilhna dingin zong zat theih ding hi cih theihna hi. Tu-in Manila panin Tedim pau tawh Nipikhat khatvei hong kigen thei hi. A hun kicing zaw, a thu kicing zaw i ngah na’ng hanciam huai hi. FEBA zumpi khat Bangalore ah om a hih ciangin India lam pan hanciam zo lehang hong kician semsem ding hi.
Lai thu i gen ciangin kampau thu tawh hong kizom hi. Topa Jesuh khang laiin Rom gam sungah Greek kam leh lai na kizang tang thei a hih manin a thu hilhna kizeel baih diak hi ci-in i thei hi. Tua mah bangin Chin Hills ah zong a kizang tang thei kampau om leh Pasian nasepna leh thu hilhna in nakpi-in mai nawt tuam ding hi. Tu-in Chin Hills ah Tedim pau bek tawh Lai Siangtho buppi kingah pan hi. Tua ahih ciangin Tedim kam pen Khanglam Khamtung gam dong na kithei khin hi leh bangzah ta-in Pawlpi-in noptuampih ding hiam! I gam leh i mite it a, Pasian thu hong phawk ding uh zong deihsak takpi i hih leh Saklam Khamtung gam bek ah hi lo-in Khanglam Khamtung gam dongin thu hilh sia i puak zawh na’ng hanciam ni. Kumpi nasemte leh sang sia semte in zong Pasian min tawh sawltak nasem zah a kingaihsun a, i Zomipih Matupite, Kanpetlet te, Paletwa te leh Asho Chin te pen zawl leh lawm a man a, khat leh khat pumpi ah khantohna hong ngah zawh na’ng uh hahkatin teci i pan ding uh kisam hi. Tua bangin i lai leh i pau dong thei sakin i sisan kibatpih i u i naute e’n puah kei, don kei le’ng, kua’n hong puah sak ding hiam! Gam dang pan mite hong pai-in hong sem le uh zong Pasian tung leh mite tungah ei a minamte adingin a zumhuai zaw zong hong suak thei phial ding hi.
No comments:
Post a Comment