(Hih thu pen Rev. Khup Za Go in July 27, 1980 Nipi Nitak nai 6-a Serampore Baptist Mission Biakinn ah a thuhilhna hi. Hih Biakinn pen William Carey leh a lawmte in 1800 kum-a a lam uh hi a, kikhopna in zang uh a, tu dongin Biakinn in kizang lai hi. Tu kum August 16 ni-in William Carey a suah zawh kum 219 a cinna William Cayer Day kici thupi takin Serampore ah pawi kibawl a, Carey leh a lawm missionary masate in Pawlpi leh tangpi ading a sepnate uh kikupna zong nei uh hi).
Ute naute aw, ankam tang tawh gentehna thu kikum leeng ci-in hong teel ing. Palestine gam ankamte pen India gama ei muh ngei ankamte tawh kibang lo hi, ci-in kigen hi. Palestine gam ankam tangte pen sing kung cia mah pha thei hi. Vasa in tua ankam tangte duh uh ahih ciangin ankam kung tunga vasa tuang pen muh ding om den hi. A tak takin ci leeng ankam tang pen a tang neu pen hi khol lo kha ding hi. Ahih hangin Palestine gam mite in na neu cihna in paunak in zang uh hi. ‘Sisan ankam’ cih khawng Judah te paunak khat ahi hi. Tua mah bangin Topa Jesuh in zong ‘ankam tang bang upna’ ci-in na gen ngei hi. (Mat. 17:20). Tua hi-a Jesuh in Pasian Gam pen ankam tang leh a khantoh zia tawh a genteh ciangin a cih nopna bel kitel pah hi. Pasian Gam thu pen neuno khat tawh a kipan thei hi-a, tua pen bangzah in tangzai ding cih pen kuamah in thei lo hi. A beisa tangthu i ngaihsut ciangin a kipat cilna thu gina lo bang ahih hangin a nung ciangin thu lian a suak tangthu tam pi i thei hi.
Thuciam Lui tangthu i et ciangin Israel mite tangthu i thei hi. Izipt gamah kum tampi salin tang uh hi. Israel mite gimna leh thuaknate Pasian in thei a hih ciangin a honkhia dingin Moses zang hi. Moses in Pasian kiangah, “Faro kiangah pai in Izipt panin Israel mite a paikhiatpih dingin kei in kua ka hi hiam?” ci zahin a ginat lohna kiphawk hi. Pasian in, “Moses aw, nang kong huh ding hi,” ci hi. Tua bangin Moses in Pasian cihna mangin Israel mite Kanaan gam annek tuidawn deih banga a kicin’na gam tun hi. Tua bangin bangmah a zong a kisim lo zah Moses in Israel minam buppi suahtakna piangsakin Israel mite tangthu pen van leh lei zahin kilumlet hi.
Thuciam Thak sung i et ciangin Nungzuite in pilna siamna a nei lo, nautang mi ahi hi. Ahih hangin Jesuh a zuih ciangun a siapa uh Jesuh tawh Khristian Pawlpi hong phuan khia uh hi. Sawltakte Tangthu i sim ciangin sawltakte pen thu thuk thei leh pilna sang a ngah mi ahih lam uh i thei kei hi. Ahih hangin tua hun lai biakna leh gam sung nuntakna thu kihei sak uh a, “Leitung gam khempeuh a kilumletsak hih mite” cihna za a ngah uh hi.
Tham loin tu hun Pawlpi tangthu i et ciangin mission thupi mahmah i cihte pen a gina lo neng khat tawh hong kipan lel peuh na hi thei hi. Gentehna in Serampore Mission thu ngaihsun pak leeng. William Carey pen mizawng ta hi a, kum 12 a phak ciangin a ban sang kah zo nawn lo hi. Naupang no lai pi mahin khedapbawl khat kiangah khedap bawl sin hi. Tua khedap bawl a sinnapa in ama laibute a sim dingin kawm a, Greek Thuciam Thak bu zong tua panin ngahin Greek lai zong sin pah hi. Tua panin Lai Siangtho a hahkat mah bangin 1785 kumin Tuiphum sia ngah hi. 1792 kumin Mikang gam Baptistte in Nottingham khuaah khoppi aneih ciangun Carey zong thu hilh dingin seh uh hi. Isaiah 54:2-3 sung siksanin thu a hilh ciangin Pasian thu puakkhiat nopna lungsim hong khangin ama sa bel Baptist Mission Society Mikang gamah kiphuan hi. A kum kik 1793 ciangin Carey te nupa pen India-ah Missionary na sem dingin teembaw tawh hong ding khia uh hi. Carey zi pen numei ahihna hang bek hi loin lai thei het lo khat hi sawnsawn ahih manin minam tuam, gam tuam, pau tuam leh ngeina tuam a zang India gam Hindu mite lakah ten’ ding a ngaihsut ciangin haksa sa mahmah hi. Tua bangin nasep hong kipan uh a, 1818 kumin tu-a Serampore College Asia gama Lai Siangtho Sanginn masa pen hong phuanin B.A., B.Sc. leh B.Com. sinna sang zong suak ahih manin Bengali mite pilna ngah masakna Sanginn suak hi. Bengali lai puahin, lokhawh, singpuak dan hoih zaw lakin, Kalate in naungeek a deihlote uh gunah a paih pahpahna uh ahi zongin, pasalte a sih ciangin a zite uh zong a pasalte uh luang tawh hallup khop ding ngeinate man lo hi ci-in gen hi. Tua bangin 1834 kum a sih ma in kam pau 50 phial, Kawl kam, Tibet Kam, Khasi leh Meitei kam dongin Lai Siangtho buppi leh a bu nono tampi a bawlkhiapa suak hi.
Ute naute aw, tua bang i cih ciangin Pasian in mizawngte, mihaite leh mi nautangte bek thupha pia hi i cihna hi lo hi. I deihna pen Pasian in thu gina lo pi-a i sehnate leh mite panin zong a thupi mahmah a vangliatna kilangsak thei hi i cihna hi zaw hi. Tu-in India gam en leeng mihing mak 700 phial i pha hi. Biakna leh ngeina atuamtuam tampi i nei hi. Gam buppi seh nih suah seh khat phial in zing leh nitak nek ding an i ngah zo kei hi. Seh ni suah seh khat tang mah lai sim thei lo en thei lo i hi hi. I gam vaihawmna akipan i gam biakna leh annek tuidawn dongin haksatna i tuak hi. Tua zaha mial leh haksatna gam sungah a teng a nungta ihi hi. Hih thute in India gam Khristian Pawlpite hanciam ding leh sep ding thu lian khat ahi hi. Tu nia ei Khristiante i ki-et ciangin mak 17 tang bek hi. Mihing za pai ciangin nih leh alang tang bek Khristian i pha hi. Hizahta gam lian pi sung ah, minam tawm, pawl tawmte kisuak hi. Hih thute i lungngaih ciangin Moses mah bangin i liing kha ding hi. Ahih hangin Pasian mi pawl tawmte hi hang! I tha hatna pen Pasian vangliatna sungah om hi. A khasia, a lungmang leh cimawh a ton mawk ding te i hi kei hi. I Topa Jesuh in, “Note leitung ci na hi uh hi,” ci ngei hi. Pasian khaici in India gam bek hi loin leitung buppi zeel ding hi. Thagum hat hang hi lo hi, vangliatna hang zong hi lo, Keimah tung panin na ngah Kha hang bek tawh na ma na tun zo ding hi”(Zekh 4:6).
Pasian thu in ci hi. Amen.
No comments:
Post a Comment